مدينة الملائكة تسكنها الشياطين ..سر مقتل اليزابيث شورت

المكان في لوس انجلوس , او كما يطلق عليها الغربيين , مدينة الملائكة , تحديدا في هوليوود , المنطقة الاكثر ثراءا والى ساكنها معظم ممثلين العالم المشاهير , بس ليه الجريمة هناك ؟ عشان الى اتقتلت هناك كانت من اهل هوليوود ...


لغز مقتل اليزابيث شورت


بداية قضية مقتل الداليا السوداء

اليزابيث شورت بين الشجيرات حاجة شبه المانيكان , عروسة بحجم انسان , السيدة بيرسينجر قربت كده من المانيكان دى وبصت عليها لقيتها جزئين , جزء في رجلين ومفيش حواليه اى علامه انه ل انسان ده اكيد مجسم بس مصنوع كويس قوي بس لحظة كده , هو الى هناك ده بجد ؟
السيد بيرسينجر شافت الجزء الثانى من الجثة , الجزء العلوى الراس والذراعين وباقي الجثة المشوهة ..... , السيدة جريت وبلغت عن الى شافته وحضرت شرطة لوس انجلوس وكمان استدعوا المباحث الفيدرالية FBI , عشان الموضوع كبر قوي
الجثة كانت مشوهة بصورة غريبة جدا , مقسومة ل نصفين تماما .....هنرجع للتفاصيل بس جثة مين دي ؟
بعد ساعة تقريبا قدروا يعرفوا مين دي عن طريق بصماتها , الجثة لممثلة صاعدة اسمها , اليزابيث شورت , او زى ما اطلقوا عليها بعد وفاتها , الداليا السوداء

الوجه القبيح للصحافة الامريكية فى قضية مقتل الداليا السوداء


الصحافة وهى شريرة الى حد لايمكن تصديقه , اتصلت احدي الصحف ب ام اليزابيث , السيدة ماي شورت , وقالوا لها بنتك كسبت في مسابقة تمثيل مهمة جدا وعايزين منك تفاصيل عن حياة اليزابيث , احكيلنا كده حكايتها وتاريخ حياتها عشان ننزله مع التكريم في الجريدة !
اليزابيث شورت , اتولدت في مدينة هايد بارك عام 1924 , ل اب يعمل في مجال ملاعب الجولف واسمه – كليو- وامها – ماى , الامور كانت كويسة مع العائلة لغاية سنة 1929 , حصلت الازمة الاقتصادية الكبري , او الكساد الكبير , الازمة اثرت علي الجميع من ضمنهم عائلة شورت , الى اضطر والد اليزابيث انه يسيب بيته وتنقل العائلة لبيت اصغر كتير عاشت فيه اليزابيث مع امها واخواتها الاربعة لكن والدهم سابهم , وراح كاليفورنيا .
ام اليزابيث اشتغلت بوظيفة مكتبية , وكان الدخل قليل , واشتغلت اليزابيث من عمر 16 سنة ك نادلة في المطاعم والمقاهى , واتقبض عليها مرة بتهمة تناول الكحوليات تحت السن القانونى قيل انه في سن ال 16 وقيل انه كان بعد شغلها في القاعدة العسكرية لكن المهم انه اتقبض عليها ودخلت فترة سجن الاحداث وبقي ليها بصمة في المباحث الفيدرالية , خد بالك البصمة دى مهمة جدا دى إلى اتاكدوا منها أنها جثة إليزابيث
كبرت اليزابيث وكانت بتجلها ازمات ربو والتهاب شعبي فكانت امها بتبعتها لولاية فلوريدا في الشتاء عشان ادفي وترجع تعيش تانى مع امها واخواتها باقي السنة في مدينة مدفورد , لحد ما وصلت سن 19 سنة وقررت السفر لعند ابوها في جزيرة ماري للسفن البحرية , وبعدها سافرت اليزابيث وقدمت على شغل , كطباخة فى الجيش في قاعدة فانديبرج العسكرية واشتغلت فترة قصيرة وقررت بعدها السفر الى فلوريدا مرة تانية وهناك قابلت حب حياتها ,
الرائد / ماثيو م جوردون , وكان ضمن الفرقة الجوية بالحرب العالمية الثانية , ماثيو كان قائد مميز في الجيش , في نفس السنة طائرته وقعت في الهند وهو بينقذ زميله ونجي ماثيو وبسبب شجاعته نال وسام القوات الجوية النجمة البرونزية , و قالت اليزابيث ل صديقاتها انه بعت رسالة ليها و انه عايز يتجوزها وهى وافقت وكانت طايرة من السعادة
لكن السعادة انتهت لما ماثيو مات , طائرته وقعت يوم 10 اغسطس 1945 م , قبل ما يرجع ل امريكا , وانهارت اليزابيث تماما , وانهيارها ده هو سبب مقتلها هتعرف ليه دلوقتى
سافرت اليزابيث , وسنة 1946 كانت علي موعد مع النجومية الى ملحتقش تستمع بيها علي الاطلاق ,
شكلها كان ملفت للنظر جدا , جميلة بعينيها الزرقاء وشعرها البنى وملامحها الجميلة الحزينة , قررت تاخد المشوار من اقرب سلم للفلوس والشهرة وبدأت تخبط علي ابواب المنتجين واستوديهات التمثيل في لوس انجلوس , وفعلا نجحت انها تاخد ادوار ثانوية بسيطة في كام فيلم , وقيل لانها كانت بتلبس اسود كتير , وكانت بتحط في شعرها زهرة الداليا , اطلقوا عليها زهرة الداليا السوداء .
شكلها كان جميل , لكن المخرجين قالوا انها بلا موهبة , وبالتالى سلم النجومية هيطول قوى عشان تقدر اليزابيث تطلعه وتحصل علي المال اللازم للحياة فضلت تتنقل من مكان للتانى ومن فندق للتانى وعايشة حياة غير مستقرة علي الاطلاق و قالوا صديقاتها وزميلاتها في السكن ان نفسيتها كانت دائما سيئة جدا بسبب وفاة ماثيو ومقدرتش تتخطى حادث وفاته , بعد فشلها في التمثيل
هنا قررت توسع شغلها وتشتغل بجانب التمثيل في الحانات , في الاول اشتغلت ك نادلة زى ما كانت زمان , وبعدها اصطادتها واحدة من الى بيديروا الامور في المكان , خلتها تشتغل كمرافقة للزباين , واتعرفت اليزابيث ودخلت في عالم مخيف , مكانش لازم تدخله ,
من ضمن الناس الى اتعرفت عليهم اليزابيث كان زعيم عصابة معروف السيد (س) , وناس في مناصب حساسة , بس اقواهم نفوذا كان السيد ( ن ) وده كان حكام المدينة كلها من تحت الطرابيزة , مفيش حد ممكن يتعين في أي منصب مهم من غير ما يوافق هو وعائلتة الاول , مفيش ناموسة تدخل او تخرج الا باذنه , وكانت علاقتها بالسيد (ن) ورقة الموت بالنسبة لها
لشهور فضلت اليزابيث كما هى , ممثلة ثانوية في ادوار صغيرة , وعشيقة لشخصية هامة جدا , لحد ما اختفت اليزابيث فجأة وبدون مقدمات .......
المباحث الفيدرالية تعجبت من تشويه الجثة الغريب , مقسومة بمهارة طبية عالية جدا , الايدين والرجلين عليهم اثار حبال كانت مربوطة بيهم يعنى اتعذبت قبل مقتلها , وفي تشوه في المنطقة التناسلية , تم نزع الرحم تماما و توشوهات اخري في الجزء العلوى من الجسم , وقام القاتل بعد وضع الجثة بمكانها وضع بين الرجلين كل الاحشاء الى طلعها من جسمها , واخيرا وضع بصمته علي وجه القتيلة بأنه عملها قطع في وجهها من الجانبين زى (الجوكر ) عشان يشوه وجهها , المشهد كان مروع , مين المريض الى ممكن يعمل كده ؟
محدش عرف , التحقيق اتقيد ضد مجهول , لكن بالنسبة للبعض مكانش مجهول قوي ....
مكالمة جت لجهاز الشرطة من مجهول وقال لهم انه يعرف مين الى قتل اليزابيث , وانه هيرسل لهم في البريد حاجات تخصها , وفعلا جالهم في البريد فردة حذائها ومعاها بطاقات شخصية ل اسماء من ضمنها واحد كان صديق اليزابيث اسمه هانسن وتم الاشتباه بيه فورا بعدها ولكن تم اخلاء سبيله مفيش اى دليل عليه
بعد فترة من العثور علي جثتها , تم العثور علي فردة حذائها الاخري وعلي حقيبة اليد الخاصة بيها وفيها اسماء وعنواين لبعض الشخصيات ومن هنا الشبهات راحت ل اكتر من 250 مشتبه بيهم , غير الناس الى تطوعت واعترفت بالجريمة عشان يشتهروا , ايوة صدق جنون الشهرة ممكن يخلي واحد يعترف بجريمة قتل خاصة جريمة زى دى حديث الصحافة كلها وقتها , ده غير البلاغات الكيدية لناس بلغوا عن قرايبهم واعدائهم انتقاما منهم
كل المدعين باحثي الشهرة ثبت كذبهم وتم اخلاء سبيلهم , اما المشتبه بهم فهم في دائرة رمال متحركة , متقدرش تقرب هناك ابدا
من المشتبه بهم كانوا منتجين ومخرجين سينما ورجال في مناصب مهمة ورجال عصابات وغيرهم , وطبعا التحقيق اتقفل لان القضية ملهاش أي ادلة من اى نوع
الجثة كانت مصفاة من الدماء تماما , مفصولة بعناية فائقة جدا وده خلى الاتهام يروح للاطباء , حققوا مع الاطباء وطلبة كلية الطب في جامعة كاليفورنيا , بدون اى نتيجة
لكن الرواية الى اتحكت بعد كده , كانت النظرية الاقرب ل ايادي قتلة اليزابيث ,
زعيم اشهر عصابة في كاليفورنيا في الوقت ده , السيد (س) كان هو المنفذ ل اوامر السيد ( ن) بقتل اليزابيث بعد ما اليزابيث اعلنت له انها حامل منه
طلب منها انها تتخلص من الحمل الغير مرغوب فيه والغير مرغوب فيها هى شخصيا , لانه مش هيخاطر بسمعته الاجتماعية والسياسية وحياته الزوجية عشان خاطرها , لكن اليزابيث رفضت
وخافت من تهديده وسافرت لمكان بعيد ولكن بعد كام شهر لما الفلوس الى معاها خلصت , رجعت وكانت مغيرة لون شعرها عشان تخفي نفسها , لكن اخر مكان اتشافت فيه كان مكان تابع للشخص ده ,وهنا ده كان دليل لكن غير معلن وغير رسمي واختفت بعدها تماما , وبعد سنين اتقال من صديقاتها سرا انها قالت لهم انها حامل وده كان سبب ارجح ل استئصال الرحم بالكامل عشان يخفوا اى معالم للحمل , والدليل الداعم للرواية دى هو وجود اسماء ل 4 اطباء نساء من الى بيعملوا عمليات مخالفة للقانون في دفتر تليفون اليزابيث
ليه الجثة ظهرت ؟ ليه الى قتلها مكانش قادر يدفنها في أي مكان ؟
غالبا ظهور الجثة مشوهة بالشكل المريض ده , كانت اعلان عام لاى حد اليزابيث اعترفت له او يعرف انها كانت حامل من السيد (ن) , عشان الى يشوف الى حصلها ينسي تماما علاقته بيها او اى معلومة قالتها له اليزابيث شورت
بعد فترة اقل من سنة تم العثور علي جثة زعيم العصابة (س) مقتول بغرفته في الفندق
تم العثور علي جثة لطبيبة امراض نساء منتحرة وكانت علي صلة بالعصابة الاجرامية نفسها
وتم العثور علي اخرين كانوا متورطين او مشتبه بهم , ولحد هنا القضية وقفت تماما , او حتى ذكرها لغاية ما اتعمل عنها افلام وروايات في الثمانينات ولحد دلوقتى ...
تم دفن جثمان اليزابيث في كاليفورنيا , واتقفلت معاها حكايتها واسرارها , مين الي قتلها وليه , وهل كانت نظرية ورواية السيد (ن) هى الصح ولا كان في رواية تانية محدش يعرف عنها حاجة ؟
, لحد النهاردة كل كام سنة بيظهر شخص ويدعى انه عارف مين الى قتل اليزابيث شورت , لكن الجانى الحقيقي دفن سره مع زهرة الداليا السوداء .

تعليقات